Te tau
ini pamarentah so pe jago skali atau bagimana, kon so sampe bisa bakase terbit
itu izin buat perusahaan nikel pake tanggal yang sama, padahal itu izin buat
dua pakarjaan yang beda jaoh. Om susupo heran juga baliat ini izin, karna ada
izin yang buat mo baambe atau soboleh angkot tanah, depe tanggal terbit sama
deng izin yang baru buat mo bacari-cari. Padahal, dari yang om susupo tau, itu
izin buat mo baambe depe tanah, bisa takaluar kalu so ada depe studi kelayakan.
Yang
bikin om susupo heran skali kon so jadi babatanya, bagimana depe kajadian kon
itu izin buat mo ba ambe depe tanah galian, sama deng izin waktu baru mo
bacari. Baru kapan kira-kira dorang ada babikin depe studi kelayakan.
Yah, om
susupo bukan mo halangi ini orang yang ada babagale tambang. Om susupo juga te
ada daya mo bahalangi, apalagi kalu mo bapele itu bego yang pe basaar, om
susupo pasti bacigi. Jadi te mungkin om susupo ada kemampuan mo bapele ini
orang yang mo tambang. Cuma, om susupo pe otak yang kasian cuma ada skolah
kede-kede, so kacau balau baliat ini pamarentah yang pe hebat skali, sampe bisa
bakase terbit izin buat dua pakarjaan yang beda tapi di tanggal yang sama.
Bukan cuma itu, dari yang om susupo liat-liat pake kaca pembesar, ternyata depe
nomor surat juga rupa kalangkabut, karna nomor surat buat baambe depe galian
macam duluan terbit, baru nomor suratnya SK yang baru buat mo bacari. Kira-kira
te tasalah kase nomor surat ini ?
Cuma so
itu, kalu memang om susupo yang ada tasalah, jang langsung marah sama om
susupo. Jang juga langsung bakirim preman yang pe ganas kon depe badan punuh
tato bacari sama om susupo. Om susupo kasian panakut skali. Cuma so itu, om
susupo pe kabiasaan memang suka baliat-liat yang garaap, termasuk soal izin
yang juga garaap...
Karna om
susupo pe anggapan, barangkali memang so ada yang kalangkabut waktu bakase
terbit ini izin. Kan ada depe masa itu izin pertama, kon kalu te salah satu
taon. Jadi, nanti kira-kira somo dekat abis waktu izin pertama, baru ba urus
buat izin kadua yang somo basuruh baambe depe galian. Yang om susupo kuatir,
jang-jang karna ada pikiran takait deng soal politik, jadi daripada mo batunggu
nanti satu taon kemudian baru mo kase terbit depe izin lanjutan yang mo basuruh
baambe galian, kon blum tantu ini pajabat yang baru mo bakase terbit izin
kadua, jadi akhirnya ada yang so kalangkabut, kon akhirnya dorang so bikin akan
satukaligus, buat izin yang baru basuru babacari deng izin yang sobasuru baambe
depe galian, dibikin sama-sama saja depe tanggal. Kon akhirnya, lahir kamari
izin kalangkabut.
Om susupo
cuma bapikir, kira-kira kalu memang ini pamarentah mau bakase bae, coba
diliat-liat ulang itu izin, kon kase bae kasian, supaya jang kalangkabut. Baru,
kalu memang itu perusahaan ada depe niat bagus, mustinya dikarja bae-bae samua
depe urusan yang ada disuruh di dalam izin, supaya te tasangkot deng sagala
rupa masalah. Karna kalu om susupo liat-liat itu izin yang dipake buat mo
babacari galian, so ada samua ditulis apa-apa yang musti dibikin. Tugasnya
pamarentah, coba pareksa itu yang so dibikin-bikinnya perusahaan, supaya jang
kalangkabut macam skarang ini, sampe so ada masyarakat yang akhirnya nekat pigi
bapele bego deng buldoser yang mo lewat...**
