Mudah-mudahan bukan ‘ada udang dibalik batu’

Om susupo sempat kaget juga baliat kejadian demi kejadian di dewan kamarin, pas ada paripurna RAPBD Perubahan. Te tau kanapa, cuma rupa ada yang sadikit laen dari biasanya. Pertama, waktu sementara paripurna, pas giliran mo ditanya soal bakase sampe pemandangan umum fraksi, sempat tabadiam babarapa waktu, sampe itu katua dewan terpaksa batanya ulang. Baru abis itu, muncul suaranya satu fraksi yang ba usul, supaya pemandangan umum ditunda sampe Jumat. Abis itu sempat tabadiam ulang samua, sampe katua dewan ada babilang, ini dewan macam cuma ada satu fraksi. Abis itu baru fraksi laen so baku ikot babilang sama, supaya paripurna badengar pemandangan umum fraksi dibikin nanti Jumat. Abis itu, muncul lagi suara yang rupa mo bakase harus, supaya ini eksekutif ba stor itu RKA atau rencana kegiatan anggaran, padahal biasanya, dewan bakase lurus saja pembahasan, mo ada RKA atau tidak. Cuma kalu yang kamarin, memang macam so musti skali.
Baru sarta abis paripurna, ada lagi yang om susupo liat rupa laen dari biasanya. So ada yang babacarita luar biasa, tapi depe model tatap laen. Bapinjam istilahnya anak-anak ABG skarang, ‘kaliatan rupa galau.’
Yah, om susupo sempat baperhatikan itu kajadian-kajadian yang rupa laen. Cuma katua dewan sandiri ada babilang, ah te ada yang laen. Soal baminta RKA, itu memang musti dipenuhinya eksekutif, karna dewan mo bakaji rencana kegiatan di APBD Perubahan ini.
Om susupo cuma baharap, ini model-model yang rupa laen, kon rupa mo tatambah ganas ini dewan, memang murni buat mo ba perjuangkan rakyat pe kaparluan, bukan karna ada harapannya dewan yang te tatampung, atau orang-orang tua bilang, bukan karna ada udang dibalik batu.
Itu katua dewan sandiri babilang, sikapnya dewan yang kaliatan laen dari biasa, bukan karna dorang pe harapan te tatampung. Dewan dia bilang memang mo suka karja serius. Yah, om susupo juga baharap memang bagitu depe asli. Kalu memang mo serius baperjuangkan rakyat pe kaparluan, kase liat itu serius asli, kon te perlulah pake kaliatan galau. Jang sampe kalu kaliatan galau, muncul om susupo pe curiga, jang-jang ada udang dibalik batu, cuma depe udang orang laen so tangkap duluan, kon akhirnya yang tasisa tinggal depe batu...**