Om susupo sebenarnya salut deng ini programnya pamarentah yang ada bakase bantuan sapi buat kelompok di desa-desa. Itu sapi kan depe harga mahal, jadi kalu dikase sama orang desa, kon bisa dorang piara bae-bae sampe ada depe anak, baru diurus bae-bae turus, tantu babikin sejahtera ini orang kampong. Kalu so banyak, kan dorang bisa jual. Apalagi dari yang om susupo dengar, ini bapiara sapi di kampong jug ate talalo susah, karna depe makanan masih banyak. Dorang bilang yang penting rajin ba atur depe makan, kon rajin bapindah sapi pagi deng sore, so pasti itu sapi jadi sehat kon gampang berkembang biak.
Bayangkan, kalu orang-orang yang miskin kon te ada sapi baru dikase bantuan, tantu dorang pe sanang luar biasa.
Cuma yang bikin om susupo bapikiran sampe stress, ternyata ada yang babilang, ada bantuan sapi yang depe sasaran te talalo tepat. Ada yang om susupo dengar, bantuan sapi akhirnya jatoh sama anaknya oknum anggota dewan. Yah memang anaknya anggota dewan juga bisa bapiara sapi. Cuma kan kalu depe tujuan buat bakase sejahtera rakyat miskin, om susupo pikir so te talalo pas, kalu yang badapat anaknya anggota dewan. Yang namanya anggota dewan, om susupo pikir so pasti bukan kaluarga yang depe ekonomi kalangkabut. Tagal itu, kalu bantuan sapi kon akhirnya yang badapat termasuk anaknya anggota dewan, barangkali boleh dipikir-pikir ulang.
Skali lagi om susupo te ba anggap anaknya anggota dewan te bisa bapiara sapi. Dia juga bisa badapat bantuan. Cuma kalu bapake ukuran prioritas, mustinya kan lebeh bae kase yang laen dulu, jang dulu yang depe kaluarga pe ekonomi ada sehat wal afiat. Coba kasian pikir akan dulu om susupo pe kaluarga yang ada hidup kalangkabut, kon hele mo badapat bantuan ternak ayam pe susah skali.
Te ada gunanya ini bantuannya pamarentah banyak, programnya pamarentah hebat-hebat, kalu depe sasaran masih te talalo pas. Mustinya kan ini program bantuan ka kampung-kampung, lebeh baliat orang pe kahidupan yang masih kalangkabut kasian. Beda kalu itu kampong so hebat-hebat samua, so te ada yang kalangkabut, samua so ada sapi barangkali, baru yang dikase bantuan boleh sapa saja. Tapi kalu memang masih ada yang lebeh pantas, lebeh bae kase yang laen dulu, supaya dorang yang dibantu itu bisa bakase be dorang pe hidup juga. Tapi kalu memang itu bantuan bisa buat sapa saja, te baku pusing deng depe sasaran, yah bikin-bikinmo. Om susupo pikir, mo diapa kalu memang bagitu depe model…**
