Mo tunggu bukti

Om susupo sanang juga, karna itu bosnya kepolisian di kampungnya om susupo ada babilang, kalu kasus BBM yang ada ditangkap-tangkap te menguap. Depe proses hukum tatap bajalan, kon skarang ada dipareksanya depe anggota. Memang dia bilang, depe proses lama, karna beda deng kasus laen, tapi tatap diproses. Yah, om susupo sebagai orang kacili, parcaya saja deng apa yang dibilangnya bos polisi itu.

Cuma biar bagitu, om susupo tatap mo baku tunggu deng janji mo baproses itu masalah BBM yang ditangkap-tangkap sampe tuntas.

Karna slama ini om susupo ta ingat-ingat deng kasus BBM yang rupa ilang, ko so te jelas depe ujung lagi. Kalu te salah ingat, dulu pernah ada kasus BBM yang tatangkap di komplek Jole, dekatnya itu hotel, kon sampe skarang depe kasus so ilang. Om susupo juga masih ingat deng kasus-kasus laen, yang juga rupa so ilang ditalannya bumi. Itu kasus minyak tanah yang ada dibawanya pajabat kon tatangkap di Pagimana saja, sampe skarang rupa so te jelas depe kabar. Memang so bukan sama polisi, karna so taproses di
lembaga laen, tapi yang jelas depe kasus blum kalar-kalar sampe skarang.

Om susupo pikir,  ini samua patugas hukum musti bakase jelas dorang pe kasus-kasus yang ada tatangkap, ada tasita, kon depe barang bukti ada ditahan, supaya jang muncul carita yang sambarangan diluar. Karna kalu depe proses te jelas, memang pasti muncul carita sagala rupa, kon so muncul isu sambarangan. Tagal itu, supaya te muncul carita sambarangan, yah itu kasus memang musti diproses sampe tuntas, supaya ditau, itu memang kejahatan atau bukan.

Om susupo percaya, samua orang masih baharap supaya ini hukum memang badiri deng gagah skali diatas samua, kon depe proses bajalan deng lurus. Jadi, om susupo deng orang-orang laen masih tatap mo baku tunggu deng itu proses hukum yang polisi bilang ada bajalan, kon mo baliat sampe dimana depe ujung…**