Jalan Atau Garasi...

Jalan Atau Garasi

Makin hari, ini kota Luwuk dapat liat makin hebat..Kendaraan so pe banyak skali, so rame, sampe-sampe macam ini jalan di tengah kota so te cukup mo batampung orang Luwuk pe oto deng motor.Tapi biar ini jalan so pol deng oto deng motor, ada yang om susupo liat unik juga. Ini jalan yang dipusat kota, tepatnya yang dikomplek pertokoan, ternyata so ada yang macam dikuasainya pemilik toko, kon dorang so pake buat tampat parkir tatap,parsis dorang pe garasi sandiri. Padahal, yang dorang ada pake itu jalan umum, kon depe biaya dari doinya rakyat samua, bukan doinya itu orang perorang yang ada oto.

Om susupo liat ini yang aneh skali kon macam dikase biarnya pamarentah. Bayangkan saja, karna te ada depe halaman, sebab dorang pe halaman so dibikin toko, eh yang jadi sasaran itu jalan umum buat dorang pake parkir kandaran sampe pagi. Baru, sarta so siang, masih juga dorang pe oto bakuasai jalan umum itu. Kalu ada orang yang mo parkir di pinggir jalan di komplek pertokoan itu, macam musti capat-capat kaluar, kalu so ada otonya dorang yang datang. Jadi, parsis so dorang punya itu jalan, karna macam cuma dorang yang boleh pake parkir satu hari pool sampe malam, kon sampe pagi lagi.

Yang jadi pertanyaannya om susupo, kira-kira dorang ada babayar retribusi pake aturan apa, kalu so parkir siang malam. Jang-jang, te ada depe pemasukan buat daerah, padahal dorang so pake jalan buat dorang pe garasi. kalu memang te ada depe biaya, mustinya harus ada ketegasan pamarentah, supaya jang dorang pake itu jalan buat tampat parkir tatap. Kalu dikase boleh, tantu harus jelas juga barapa depe bayaran yang maso sama kas daerah.

Om susupo cuma mo kase ingat pamarentah, itu jalan depe status masih negara punya, kon depe perbaikan deng pemeliharaan pake doi rakyat. Jadi, jang sampe ada yang basimpan oto sampe pagi di atas jalan, baru te babayar. Kalu sampe dorang te ada depe biaya khusus, om susupo mo kase saran, lebe bae samua orang yang te ada halaman, pakejo jalan buat tampat simpan oto, atau bole juga buat tampat simpan barang-barang rumah tangga, kan te ada depe beda, sama-sama ada bapake jalan umum...**