Karna hanya bangsa yang depe orang-orang sehat, yang mo jadi bangsa yang kuat. Noh bagimana mo jadi bangsa yang kuat, kalu depe rakyat banyak yang sakit.
Cuma bukan berarti, orang sakit itu te ada depe guna. Karna macam dikampungnya om susupo, ternyata dari orang sakit, bisa jadi sumber buat doi daerah.
Kalu so te ada yang sakit, samua so sehat-sehat,so kuat-kuat, kon so te pernah ba injak rumah sakit deng puskesmas, so pasti ini daerah yang kalangkabut.
Bagimana te mo kalangkabut, kalu ternyata dari orang-orang sakit itu, ini doi pendapatan asli daerah bisa didapat.
Om susupo saja kaget baliat itu catatan di nota keuangan, karna ini retribusi pelayanan kesehatan masih jadi tukang sumbang doi asli daerah yang paling basar.
Te salah-salah, itu sumbangannya retribusi yang dipungut dari orang-orang yang sakit, depe jumlah 30 persen dari rencana doi doi daerah yang mo didapat taon depan.
Ini pamarentah kan ada babikin target amper 48 miliar itu doi asli daerah, kon ternyata amper 15 miliar depe sumber dari retribusi pelayanan kesehatan.
Om susupo juga bingung baliat ini model. Karna kalu te salah ingat, mudah-mudahan ini pamarentah juga te lupa deng depe proram, ada itu pelayanan kesehatan gratis.
Baru kira-kira, kalu ada pelayanan kesehata gratis, kon sumbernyata doi asli daerah masih dari pelayanan kesehatan, berarti rupa te ada pengaruh itu kesehatan gratis, karna doi yang mo dipungut dari orang-orang sakit masih tatap lebeh banyak dari anggaran buat bakase gratis itu kesehatan.
Yah, om susupo pikir, ini orang sakit ternyata tatap diparlu juga. Cuma jang sampe ada yang bapikir, ini orang sakit musti dipiara, supaya tatap sakit, atau depe jumlah dikase banyak, supaya tatap bisa basumbang doi daerah.
Cuma kalu mo bapikir normal, coba kasian cari saja sumber doi daerah asli daerah yang depe tampat bukan dari orang-orang sakit.
Karna ini tugasnya negara sampe daerah, kan babikin supaya depe rakyat jadi sehat wal afiat. Yah, memang itu rumah sakit deng puskesmas tatap bisa jadi tampat sumbernya doi daerah, cuma kalu boleh, jang juga dipatok jadi sumber paling basar…**
Foto : ilustrasi om susupo/ Inilah.com
