Apalagi samua orang juga tau, ini BBM memang licin, kon bisa babakin samua tapalisi kalu badapat injak. Baru itu BBM juga kan gampang butul manguap, apalagi kon depe panutup jergen dibuka di panas-panas matahari, so pasti langsung manguap. Tagal itu, om susupo baharap, supaya ini kasus BBM dikase jelas, so bagimana depe proses, so ada depe tersangka atau tidak, atau itu kasus so ditutup ? pokoknya parlu dikase jelas, supaya jang ada yang bapikir, kalu itu kasus BBM memang so kalaut…
Karna so ada bukti kasus BBM yang te jelas, macam itu solar yang pernah ditangkapnya masyarakat di Toili, tapi skarang depe ujung rupa so ilang dikomba-komba. Yah, om susupo cuma mo bakase ingat patugas, supaya dorang smangat ulang ba karbas ini praktek bakorupsi BBM subsidi. Jang sampe itu kajadian babatangkap BBM, akhirnya kabur juga depe sambungan.
Om susupo juga tau, ini karjanya polisi memang banyak, kon samua pasti bikin suak patugas. Tapi karna om susupo liat, ini soal BBM kan takait deng soal doinya rakyat yang dipake basubsidi, jadi mustinya dikase prioritas, supaya jang sampe depe minyak so talanjur manguap, kon depe bau tabawa angina, akhirnya yang tatinggal cuma depe jergen, kan kasian skali. Kalu sampe te tuntas, kan lebeh bae memang te usah ditangkap, supaya jang muncul baku curiga. Karna macam itu BBM yang ditangkap di Bunta, ada takait deng perusahaan di Pagimana. Jang sampe karna so talalo jaoh depe perjalanan, akhirnya samua manguap.
Om susupo minta maaf sama patugas, karna om susupo cuma mo baku kase ingat, supaya jang ada lagi yang babarmain deng soal BBM yang disubsidinya rakyat. Kalu memang ta usut, yah carita akan sama wartawan supaya dorang beritakan, kon kalu memang tabrenti, carita juga sama wartawan supaya om susupo baca depe berita…boleh bagitu kira-kira ??..**
