Kota Aer, Kota Banjir
Sampe skarang ini, om susupo masih tatap bangga deng ini Luwuk. Orang bilang gagah kalu diliat dari kelas, memang gagah. Orang bilang unik, memang unik, karna ada depe perbukitan, ada depe lembah, ada depe sungai, depe laut dan depe teluk di tengah kota. Orang juga bilang kota aer, memang parsis karna banyak aer... Sampe-sampe karna so talalo banyak aer, biar te ada ujan karas, eh ada depe banjir, kon ditengah kota lagi.
Yah, ini yang memang torang samua ada liat kamarin di jalan pertokoan sampe pelabuhan. Cuaca kamarin pagi pe panas, kon ada jalan yang tatonoh aer. Jalan samrat dari sablah kantornya bank perkreditan sampe palabuhan memang jadi banjir. Tapi om susupo liat, itu banjir bukan dari kuala, tapi dari saluran kacili yang sopunuh deng sampah, jadi depe aer tatumpah ka jalan, kon jalan raya jadi tatonoh.
Yang babagini ini yang om susupo rasa parlu dikase ingat sama ini pamarentah, supaya urus itu kondisi kota. Bukan cuma soal aer yang so tatumpah sampe banjir, tapi pe banyak soal laen sampe soal jalan di pertokoan yang macet-macet karna jalan so dipake buat tampat parkir deng garasinya pemilik toko. Tapi yang aneh, ini jalan dipertokoan yang amper tiap hari ada depe macet, kon ditambah banjir karna got so te beres, eh pikirannya pamarentah justru mo kase lebar jalan ka Bandara Bubung. Om susupo pusing bapikir akan bagimana ini jalan pikirannya pamarentah. Laen yang ada masalah, laen yang mo dibikin akan solusi. Itu jalan ka bandara, om susupo liat, te pernah ada masalah. Lancar, jalan cukup bagus dibanding jalan ka lamala, lebar dan lebeh lebar daripada jalan di pertokoan. Baru kalu lancar, buat apa mo diurus skarang ini, macam blum parlu. Mustinya, yang dipikir akan ini jalan di tengah kota yang macet, bukan jalan ke lapangan terbang yang cuma mo kase sanang itu orang yang mopigi nae pasawat. Coba pamarentah kase normal ulang pikiran, kon liat akan mana yang sebenarnya banyak masalah, kon itu yang diurus. Bukan yang te ada masalah yang mo diurus duluan. Om susupo curiga, jang-jang ada titipannya kontraktor tertentu, supaya itu jalan ka bandara yang diurus...???**
