Irama Kata dan Laku

Assalamu ‘Alaikum....mosia kabar ini hari? Bee utus, ini Om Susupo ada takaget ba dengar Pak Bupati so ba togor kapala desa dengan orang di Paisubuloli. Om Susupo dengar, Pak Bupati ba marah soal SKPT yang dikase kaluar sambarang baru dijual, Pak Bupati juga ba marah soal ba ambe-ambe paser deng batu yang te pake izin. Om Susupo makin salut deng ini Bupati. Barangkali butul itu caritanya orang banyak yang bilang torang pe Pak Bupati ini hebat di Jakarta dulu waktu masih Anggota DPR RI. Torang doakan saja, mudah-mudahan Pak Bupati pe hebat masih tabawa sampe di Luwuk. Supaya ini Luwuk sejahterah. Amiin...
Memang so lama Om Susupo ada ba dengar-dengar kalakuannya ini pengusaha yang ba ambe batu deng paser di pinggir kuala baru dorang jual. Yang terakhir justru bikin panas Om Susupo pe hati. Hele itu hutan lolaro ada dorang garo juga. Padahal te ada depe izin. Heran juga. Om Susupo sempat su’uzon sama Pamarentah deng Anggota Dewan. Te mungkin dorang te tau ada perusahaan nakal. Te maso diakal deng kuku jempolnya Om Susupo kalo dorang te tau. Kalo manyangkal baku sumpah intah...
Tapi, serta Om Susupo ba dengar Pak Bupati so turun lapangan langsung apalagi diluar jadwal protokoler, beee Om Susupo takaget. Apalagi sampe balarang satu perusahaan ba ambe paser deng batu kalo bulum ada izin. Padahal, itu perusahaan ada depe hubungan deng pejabat. Salut Om Susupo sama Om Amat yang so jadi Bupati Banggai.
Dari pertama, Om Susupo sebenarnya rasa sayang sama Pak Bupati. Apalagi, Om Susupo tau Pak Bupati itu hebat kon pande. Cuma akhir-akhir ini, Pamarentah pe kinerja macam jadi carita te bagus. Kan kalo te bagus depe carita, Pak Bupati juga yang kana sasaran. Om Susupo masih ingat bagimana itu berkas APBD dibuangnya Ketua DPRD Banggai, kon jadi caritanya orang. Apalagi kalo dorang carita sampe di Jakarta sana. Kan yang di Luwuk skarang banyak juga orang dari Jakarta? Blum lagi torang pe lolaro atau mangrove, torang pe paser deng batu yang diambe te ada izin, bukan orang dari luar ada bacarita sama dorang pe taman-taman. “Ka Luwuk saja, ba usaha disana. Pe bodok-bodok orang di Luwuk. Gampang dibaku atur akan” kira-kira bagitu orang luar ada baku carita akan torang disini.
Om Susupo pikir-pikir, sebenarnya samua Bupati di Luwuk ini orang bae. Cuma depe pajabat ka bawah ini yang kadang-kadang bikin rusak namanya Bupati. Biar Bupati te suruh ada dorang bilang “Ini perintahnya Pak Bupati”. Macam itu mangrove dengan paser deng batu. Te mungkin kapala desa malawan kalo mulai dari camat sampe kapala dinas ada ba bilang-bilang namanya Bupati.
Om Susupo rasa, statemen (hehehe, Om Susupo so jago ba bahasa Inggris) Pak Bupati yang karas di Paisubuloli harus seirama dengan kinerja samua depe bawahan. Biar karas tapi kalo bagus depe irama main pasti enak dinikmati macam lagu Under The Bridge-nya Red Hot Chili Peper yang Om Susupo ada dengar-dengar. Karas, macam ta acak, tapi karena depe irama musik baku kana jadi enak dinikmati. Bai de wei (ini bahasa inggris lagi) kalo te tau Red Hot Chili Peper te usah ba paksa.tau. Pangge saja Om Susupo supaya Om Susupo kase tau itu Om Susupo pe taman yang so hebat di California sana...Sibuk!!! **